Comunicación Previa de Obras

Se tes pensado realizar unha pequena reforma, reparación ou actuación na túa propiedade, na maioría dos casos non é necesario solicitar unha licenza de obra complexa. Basta con presentar unha Comunicación Previa no Concello.

Que tipo de obras precisan este trámite? A comunicación previa serve para informar ao Concello do inicio das seguintes actuacións:

• Fachadas e cubertas: Pintura, substitución de ventás, canalóns, impermeabilizacións ou cambio do material do tellado.
• Obras interiores: Pintura, alicatados, cambio de chans, renovación de fontanería, electricidade ou modificación da distribución interior da vivenda.
• Pequenas construcións e parcelas: Peches de fincas, pavimentados, limpeza de terreos ou edificacións moi pequenas e sinxelas (que non sexan para vivir, dunha soa planta ata 3 metros de alto e menos de 50m²).

Que documentación tes que achegar? Xunto co formulario de comunicación previa debidamente cuberto e asinado, terás que presentar:

• O xustificante de ter pagado as taxas correspondentes.
• Fotografías do estado actual do lugar onde vas facer a obra.
• Un plano de situación ou a referencia catastral exacta.
• O orzamento detallado do que custa a obra.
• Unha descrición dos materiais que vas usar e as dimensións.
• As autorizacións doutros organismos (como Augas ou Estradas) ou a solicitude de ocupación da rúa, só no caso de que a túa obra o requira.

(Nota: Dependendo da complexidade dalgunhas obras, como cambiar a estrutura do tellado ou modificar a distribución da casa, podería requirirse un informe ou bosquexo asinado por un técnico competente).

Como presentar a documentación? Podes descargar o formulario oficial xusto aquí debaixo. Unha vez cuberto, podes presentalo presencialmente no Rexistro do Concello (Praza San Rosendo, 1) ou consultarnos calquera dúbida a través do correo electrónico: concello.xunqueiradeambia@eidolocal.es.