Concello Xunqueira de Ambía
Un pouco da nosa historia
A Nosa Historia
A hora de falar de Xunqueira de Ambía, non podemos esquecer o seu pasado. Unha historia chea de acontecementos de gran importancia e de lendas que forxaron a nosa identidade.
As Orixes e a Vía Romana Entre outros vestixios, destaca a calzada romana que atravesa o noso concello e que, na época medieval, serviu aos peregrinos para achegarse a Compostela, converténdose nunha importante ruta xacobea.
A Lenda e a Colexiata A historia real sérvese da lenda para explicar as orixes da vila. O saber popular conta que, no século IV, apareceu unha imaxe da Virxe nunha lagoa onde medraban xuncos (de aí o nome de "Xunqueira"). Este milagre propiciou a construción dunha pequena ermida.
Esta capela foi evolucionando ata que, no século XII, estableceuse a irmandade de Santo Agostiño, convertendo a primitiva igrexa nun mosteiro. Xa no século XVI construíuse o seu espectacular claustro e permitiuse a edificación de casas arredor, nacendo así a vila actual. Hoxe podemos gozar de moitos vestixios daquel esplendor: a Colexiata de Santa María a Real, a Capela de San Pedro, o museo de arte sacra, pontes romanas, casas e pazos.
Un Tesouro Musical: O Órgano da Colexiata Pola súa singularidade, destaca o órgano da Colexiata, considerado un dos mellores de Europa no seu estilo. O actual é o terceiro coñecido na nosa historia; o primeiro data do ano 1536 e o segundo do século XVII.
A peza que vemos hoxe foi colocada polo construtor Manuel González Maldonado, cunha impresionante caixa obra do escultor Xoán de San Martín. Está dividido en órgano maior e órgano de ecos, con dous teclados de 45 notas. É un exemplar único da época dourada do órgano ibérico, caracterizado por un son "plenum" e unha potente linguetería.
Por este motivo, a Vila de Xunqueira de Ambía celebra todos os anos nos meses de verán unha actividade referente: os Concertos de Órgano e Música Antiga.
