Servizos Sociais Comunitarios

Horario de atención ao público: Luns a venres, de 9:00h a 14:00h na Casa do Concello.

Os servizos sociais comunitarios son a canle de acceso normalizado ao sistema galego de benestar. O noso obxectivo é garantir unha atención próxima, personalizada e confidencial para previr situacións de exclusión e mellorar a calidade de vida da veciñanza.

Programas e servizos básicos

• Valoración e orientación: Información en materia social para persoas, familias ou a comunidade en xeral.
• Servizo de Axuda no Fogar (SAF): Atención no domicilio para facilitar a autonomía persoal e a permanencia no contorno habitual.
• Inserción social: Proxectos de intervención e prestacións económicas para persoas en risco de exclusión.
• Fomento da cooperación: Impulso do asociacionismo solidario e coordinación do voluntariado social.

Prestacións e Prazos de Presentación

 A maioría dos nosos servizos pódense solicitar en calquera momento, agás convocatorias específicas:

• Valoración de dependencia e discapacidade (Lei 39/2006): Todo o ano.
• Axuda no fogar: Todo o ano.
• Plan de axuda alimentaria: Todo o ano.
• RISGA (Renda de Integración Social de Galicia) e Emerxencia Social: Todo o ano.
• Pensións non contributivas (Xubilación e invalidez): Todo o ano.
• Teleasistencia domiciliaria (Cruz Vermella e Deputación): Todo o ano.
• Programa Xantar na Casa: Todo o ano.
• Balnearios Imserso: Solicitudes ata o 31 de outubro de 2025.
• Balnearios Xunta: Pendente de convocatoria en 2025.

Natureza e Garantías dos Servizos Sociais Comunitarios

Os Servizos Sociais Comunitarios son o primeiro nivel de intervención e a canle normalizada de acceso ao sistema galego de benestar. Teñen un carácter local, aberto e polivalente, e préstanse de forma directa desde as dependencias da Casa do Concello mediante un equipo interdisciplinar.

A nosa actuación incorpora sempre unha perspectiva de anticipación e prevención das situacións que poidan causar exclusión social, dependencia ou desprotección. Neste sentido, os nosos servizos garanten:

• O dereito de acceso universal ao sistema en condicións de igualdade.
• A proximidade real ás persoas usuarias e ás súas familias.
• Unha intervención social personalizada, integradora e coordinada nun contorno normalizado.
• A derivación técnica cara ao servizo social especializado máis idóneo ou a outros sistemas de protección cando sexa necesario.
• A prevención comunitaria dos problemas sociais e a promoción da solidariedade na nosa vila.

Dereitos das persoas usuarias

• Ser tratadas co respecto debido á súa dignidade, intimidade e autonomía.
• Acceder e utilizar os servizos en condicións de igualdade e non discriminación.
• Recibir unha atención individualizada e adaptada ás súas necesidades, coa calidade e duración que requira cada caso.
• Recibir información áxil, veraz e comprensible sobre os recursos e prestacións, así como orientación nos trámites cara a outros sistemas de benestar.
• Ter asignada unha persoa profesional de referencia que actúe como interlocutora e asegure a coherencia da intervención.
• Coñecer a organización e o regulamento do servizo, así como a situación do seu expediente en todo momento.
• Ter garantido o tratamento totalmente confidencial dos seus datos persoais (segundo a lexislación vixente).
• Ser informadas de maneira clara sobre a intervención prevista, elixir libremente as medidas adecuadas (dentro da oferta e tras a valoración técnica) e participar nas decisións que modifiquen o proceso.
• A calidade dos servizos recibidos e o dereito a presentar queixas e suxestións á persoa coordinadora.
• O respecto aos seus dereitos lingüísticos, garantindo a atención e a práctica positiva do idioma galego.

Deberes das persoas usuarias

• Cumprir as normas, requisitos e procedementos para o acceso aos diferentes servizos.
• Facilitar información precisa e verdadeira, e comunicar ao persoal calquera cambio nas circunstancias familiares, sociais ou financeiras que afecten ás prestacións.
• Cumprir coas condicións do servizo e colaborar nas tarefas do persoal (poñendo á súa disposición os medios materiais necesarios cando o servizo se preste no domicilio).
• Colaborar co persoal asignado: acudir ás entrevistas, seguir as orientacións e participar no desenvolvemento das actividades acordadas.
• Manter unha actitude positiva e activa no proceso pautado de mellora, autonomía persoal e inserción social.
• Facilitar e cooperar no seguimento, avaliación e inspección do servizo.
• Respectar a dignidade persoal e profesional das persoas que lles presten o servizo, sen exceder os límites das súas obrigas laborais.
• Participar no pagamento dos servizos naqueles supostos concretos que estableza a normativa municipal.
• Comunicar con dez días de antelación calquera ausencia temporal que impida a execución dos servizos no seu domicilio.